第十八屆美濃黃蝶祭主祭文

撰文：鍾永豐（詩人，財團法人鍾理和文教基金會董事長）

揚葉仔，飛高高；船來等，轎來扛。
揚葉仔，飛高高，飛上庄頭大門樓，
同鳥仔說、撖蟲仔講：
將雙溪當做夥房，佇這裡安家，
將雙溪當做旅舍，來這裡遊聊；
通概歡迎，通概歡迎。
揚葉仔，飛過河，同魚仔講：
任在泅，水有汝等更加活潑。
揚葉仔，飛過崗，同野獸講：
自由走，山有汝等更加樂仙。

黃蝶祭十八歲，蟲鳥魚獸，一年一年齊。
佢等感謝，毋單只水庫擋下來，
還有算毋揪介公民協力；
佢等認真研究、熱心解說、全面行動；
佢等介心像山，佢等介愛像泥。

雙溪，右攬美濃山，左牽獅仔山，
定下我等介地理，化育我等介生態。
二十年介奮鬥，我等緊來緊明白：
愛惜佢等，就係愛惜祖先介化胎；
愛惜佢等，就係為我等介後代保種。

二十年介奔走，我等緊來緊清楚：
單憑我等自家介力頭，遠遠不足。
我等需要結合民間、政府、學界三支柱樁，
成立國家自然公園，
作為灶下，調理保育介資源，
作為客廳，創造積極介對話，
作為禾埕，整備監督介力量。

揚葉仔，飛高高；船來等，轎來扛。
揚葉仔，飛高高，飛上庄頭大門樓，
同雲說、撖風講：黃蝶祭十八歲，
成立國家自然公園，我等還要煞猛，
我等還要煞猛。